NON PIACCIONO A NESSUNO?
FENESTA VASCIA
Canto popolare del '500
( G.Cotreau)
Fenesta vascia 'e padrona crudele,
quanta suspire mm'haje fatto jettare!...
Mm'arde stu core, comm'a na cannela,
bella, quanno te sento annommenare!
Oje piglia la 'sperienza de la neve!
La neve è fredda e se fa maniare...
e tu comme si' tanta aspra e crudele?!
Muorto mme vide e nun mme vuó' ajutare!?...
Vorría addeventare no picciuotto,
co na langella a ghire vennenn'acqua,
Pe' mme ne jí da chisti palazzuotte:
Belli ffemmene meje, ah! Chi vó' acqua...
Se vota na nennella da llá 'ncoppa:
Chi è 'sto ninno ca va vennenn'acqua?
E io responno, co parole accorte:
Só' lacreme d'ammore e non è acqua!...
GUAPPARIA
Bovio - Falvo
Scetáteve, guagliune 'e malavita...
ca è 'ntussecosa assaje 'sta serenata:
Io sóngo 'o 'nnammurato 'e Margarita
Ch'è 'a femmena cchiù bella d''a 'Nfrascata!
Ll'aggio purtato 'o capo cuncertino,
p''o sfizio 'e mme fá sèntere 'e cantá...
Mm'aggio bevuto nu bicchiere 'e vino
pecché, stanotte, 'a voglio 'ntussecá...
Scetáteve guagliune 'e malavita!...
E' accumparuta 'a luna a ll'intrasatto,
pe' lle dá 'o sfizio 'e mme vedé distrutto...
Pe' chello che 'sta fémmena mm'ha fatto,
vurría ch''a luna se vestesse 'e lutto!...
Quanno se ne venette â parta mia,
ero 'o cchiù guappo 'e vascio â Sanitá...
Mo, ch'aggio perzo tutt''a guapparía,
cacciatemmenne 'a dint''a suggitá!...
Scetáteve guagliune 'e malavita!...
Sunate, giuvinò', vuttàte 'e mmane,
nun v'abbelite, ca stó' buono 'e voce!
I' mme fido 'e cantá fino a dimane...
e metto 'ncroce a chi...mm'ha miso 'ncroce...
Pecché nun va cchiù a tiempo 'o mandulino?
Pecché 'a chitarra nun se fa sentí?
Ma comme? chiagne tutt''o cuncertino,
addó' ch'avess''a chiagnere sul'i'...
Chiágnono sti guagliune 'e malavita!...
GIACCA ROSSA
Capaldo
Che smania, che freva,
'sta giacca, stu segno 'e russetto...
Sultanto na notte,
sapisse che male mm'ha fatto!
Torna, core 'e stu core...
pe' n'ata vota ancora
te voglio abbracciá...
Giacca rossa 'e russetto...
quanta cose mme faje ricurdá!
Maje na vota mm'ha scritto...
giacca rossa 'e russetto addó' sta?
Tutt''e ssere ll'aspetto
cu 'a speranza ca dice: "Stó' ccá!..."
Giacca rossa,
tu mme faje chiagnere
senza lacreme
appriesso a te...
Tutt''e ssere ll'aspetto
cu 'a speranza ca dice: "Stó' ccá!..."
Giacca rossa,
tu mme faje chiagnere
senza lacreme
appriesso a te...
IO, MAMMETA E TU
Pazzaglia - Modugno
Ti avevo detto, dal primo appuntamento,
'e nun purtá nisciuno appriesso a te...
Invece mo nu frato,
na sora, na nepote...
sola nun staje na vota:
ascimmo sempre a tre!
E mi hai promesso: "Domani chi lo sa...
vengo io soltanto...soltanto con mammá!..."
Io, mámmeta e tu...
passiammo pe' Tuledo,
nuje annanze e mámmeta arreto...
Io mámmeta e tu...
Sempe appriesso,
cose 'e pazze:
chesta vène pure ô viaggio 'e nozze...
Jamm'ô cinema, a abballá...
si cercammo 'e ce 'a squagliá,
comm'a nu carabiniere
chella vène a ce afferrá...
Ah...Ah...Ah...
ma, 'nnammurato,
só' rassignato:
Non reagisco più...
Io, mámmeta e tu!...
Io, mámmeta e tu!...
Ma San Gennaro mm'aveva fatto 'a grazia:
ll'ata matina nun ll'ha fatta aizá:
Teneva ll'uocchie 'e freve,
pareva ca schiattava,
io quase mme credevo
d'ascí sulo cu te...
Nu filo 'e voce, però, truvaje mammá:
"Da 'a piccerella ve faccio accumpagná..."
Io, sòreta e tu...
Jamm'ô bar ô Chiatamone:
"Vuó' 'o cuppetto o vuó' 'o spumone?"
"Chello ca costa 'e cchiù!"
Pe' ricordo 'e 'sta jurnata,
dint''a villa, ce hanno fatt''a foto...
Vò' 'o pallone, vò' 'o babbá
nun se fida 'e cammená...
guardo a essa, guardo 'o mare...
stó' penzanno 'e ce 'a mená...
Ah...Ah...Ah...
ma, 'nnammurato,
só' rassignato...
non regisco più...
Io, sòreta e tu!...
Io, sòreta e tu!...
Ammore mio, staje sempe cu 'e pariente...
chesta famiglia mme pare na tribù...
Arrivano 'a Milano,
arrivano 'a ll'Oriente...
e tutta chesta gente
sta sempe attuorno a me...
Na vecchia zia ca steva a Cefalù,
venuta ccá, nun se n'è ghiuta cchiù...
Io, zíeta e tu...
poverina, è sofferente,
ogne tanto, nu svenimento...
io, zíeta e tu...
Ll'uovo frisco, 'a muzzarella,
cammenammo sulo in carrozzella...
Stó' pavanno 'a ccá e 'a llá...
'E denare chi mm''e ddá?!
O te lasso o, fra nu mese,
stó' cercanno 'a caritá!...
Ah...Ah...Ah...
tu mm'hê 'nguajato...
mme sposo a n'ata,
nun ve veco cchiù...
Mámmeta, sòreta e tu...
páteto, fráteto e tu...
nònneta, zíeta e tu...
páteto, fráteto, nònneta,
sòreta, sòreta, zíeta,
zíeta, páteto, páteto,
fráteto, fráteto, nònneta...
nònneta, páteto...'o cane...
...Scusate giuvinò', io só' 'a bisnonna...
só' turnata proprio mo da 'o 'spitale...
Aaaaaaahhhhhh!!!!!
LUNA ROSSA
Vian - De Crescenzo
Vaco distrattamente abbandunato...
Ll'uocchie sott''o cappiello annascunnute,
mane 'int''a sacca e bávero aizato...
Vaco siscanno ê stelle ca só' asciute...
Fischio.........................
E 'a luna rossa mme parla 'e te,
Io lle domando si aspiette a me,
e mme risponne: "Si 'o vvuó' sapé,
ccá nun ce sta nisciuna..."
E i' chiammo 'o nomme pe' te vedé,
ma, tutt''a gente ca parla 'e te,
risponne: "E' tarde che vuó' sapé?!
Ccá nun ce sta nisciuna!..."
Luna rossa,
chi mme sarrá sincera?
Luna rossa,
se n'è ghiuta ll'ata sera
senza mme vedé...
E io dico ancora ch'aspetta a me,
for''o barcone stanott'ê ttre,
e prega 'e Sante pe' mme vedé...
Ma nun ce sta nisciuna...
Mille e cchiù appuntamente aggio tenuto...
Tante e cchiù sigarette aggio appicciato...
Tanta tazze 'e café mme só' bevuto...
Mille vucchelle amare aggio vasato....
Fischio.........................
E 'a luna rossa mme parla 'e te,
...................................................
A MARECHIARO
Di Giacomo - Tosti
Quanno spónta la luna a Marechiaro,
pure li pisce nce fanno a ll'ammore...
Se revòtano ll'onne de lu mare:
pe' la priézza cágnano culore...
Quanno sponta la luna a Marechiaro.
A Marechiaro ce sta na fenesta:
la passiona mia ce tuzzuléa...
Nu garofano addora 'int'a na testa,
passa ll'acqua pe' sotto e murmuléa...
A Marechiaro ce sta na fenesta....
Chi dice ca li stelle só' lucente,
nun sape st'uocchie ca tu tiene 'nfronte!
Sti ddoje stelle li ssaccio i' sulamente:
dint'a lu core ne tengo li ppónte...
Chi dice ca li stelle só' lucente?
Scétate, Carulí', ca ll'aria è doce...
quanno maje tantu tiempo aggi'aspettato?!
P'accumpagná li suone cu la voce,
stasera na chitarra aggio purtato...
Scétate, Carulí', ca ll'aria è doce!...
NUTTATA 'E SENTIMENTO
Cassese - Capolongo
Che notte! Che notte!
Che luna! Che mare!...
Stasera mme pare
scetáto 'e sunná...
Cu st'aria serena
ca scippa da 'o core
suspire d'ammore,
durmí nun se pò!
Chiara è 'a luna,
doce è 'o viento,
calmo è 'o mare
oje Carulí'!...
'Sta nuttata 'e sentimento,
nun è fatta pe' durmí...
Luntano, luntano,
p''o mare turchino,
vulesse, a te 'nzino,
nu suonno sunná...
Nu suonno 'e ducezza,
nu suonno 'ncantato,
cu tico abbracciato,
sunnanno, murí...
Chiara è 'a luna
.........................
Cchiù bella, cchiù doce,
'sta notte sarría
si tu, vita mia,
venisse a vucá...
Na storia d'ammore
te conto, si viene,
si caro mme tiene,
rispunne ca sí!...
Chiara è 'a luna
.........................
Finale:
Pe' durmí, Carulí',
pe' durmí!...
MUNASTERIO 'E SANTA CHIARA
Galdieri - Barberis
Dimane?...Ma vurría partí stasera!
Luntano, no...nun ce resisto cchiù!
Dice che c'è rimasto sulo 'o mare,
che è 'o stesso 'e primma...chillu mare blu!
Munasterio 'e Santa Chiara...
tengo 'o core scuro scuro...
Ma pecché, pecché ogne sera,
penzo a Napule comm'era,
penzo a Napule comm'è?!
Funtanella 'e Capemonte,
chistu core mme se schianta,
quanno sento 'e dí da 'a gente
ca s'è fatto malamente
stu paese...ma pecché?
No...nun è overo...
no...nun ce créro...
E moro cu 'sta smania 'e turná a Napule...
Ma ch'aggi''a fá?...
Mme fa paura 'e ce turná!
Paura?...Sí...Si fosse tutto overo?
Si 'a gente avesse ditto 'a veritá?
Tutt''a ricchezza 'e Napule...era 'o core!
dice ch'ha perzo pure chillu llá!
Munasterio 'e Santa Chiara...
'Nchiuse dint'a quatto mura,
quanta femmene sincere,
si perdévano ll'ammore,
se spusavano a Gesù!
Funtanella 'e Capemonte...
mo, si pèrdono n'amante,
giá ne tènono ati ciento...
ca, na femmena 'nnucente,
dice 'a gente, nun c'è cchiù!
No...nun è overo...
No...nun ce crero...
E moro pe' 'sta smania 'e turná a Napule!
Ma ch'aggi''a fá...
Mme fa paura 'e ce turná!
Finale:
Munasterio 'e Santa Chiara...
Tengo 'o core scuro scuro...
Ma pecché, pecché ogne sera,
penzo a Napule comm'era
penzo a Napule comm'è?!...
'O SARRACINO
Nisa - Carosone
Tene 'e capille ricce ricce...
Ll'uocchie 'e brigante e 'o sole 'nfaccia...
Ogne figliola s'appiccia si 'o vede 'e passá...
Na sigaretta 'mmocca...
Na mana dint''a sacca...
e se ne va, smargiasso, pe' tutt''a cittá...
'O sarracino,
'o sarracino,
bellu guaglione!
'O sarracino,
'o sarracino,
tutt''e ffemmene fa suspirá...
E' bello 'e faccia,
è bello 'e core:
sape fá 'ammore...
E' malandrino,
è tentatore...
Si 'o guardate ve fa 'nnammurá.
E na bionda s'avvelena,
e na bruna se ne more...
E' veleno o calamita?
Chisto a 'e ffemmene che lle fa?
'O sarracino,
'o sarracino,
bellu guaglione...
E' bello 'e faccia,
è bello 'e core:
tutt''e ffemmene fa 'nnammurá!
Finale:
Ma na rossa, ll'ata sera,
cu nu vaso e cu na scusa,
t'ha arrubbato anema e core!
Sarracino nun si' cchiù tu!...
'O sarracino,
'o sarracino'
bellu guaglione!
'O sarracino,
'o sarracino,
tutt''e ffemmene fa 'nnammurá...
.......................................................
Sarracino, sarracino...
SUONNE SUNNATE
Rainone - Capolongo
Suonne sunnate
p''e vvie sulitarie 'e Capemonte!...
'Nterra assettate
quanta vase ca ce simmo date 'nfronte!
Che sentimento!
Nce pienze cchiù Carmé'? Te vène a mente?
Suonne sunnate
p''e vvie sulitarie 'e Capemonte!...
Carmela, Carmè'...
Io che vulesse fá
pe' te vedé turná,
n'ata vota, addu me!
Frónne sfrunnate
da 'e primme viente 'e vierno 'mmiez'ê vvie...
E, scarpesate,
facevano rummore comm'a spie...
e te tremmava
'sta mana bella che mm'accarezzava...
Frónne sfrunnate
da 'e primme viente 'e vierno 'mmiez'ê vvie!
Carmela, Carmè...
Ammore amato
p''e vvie sulitarie 'e Capemonte...
Nce só' turnato
ma pure 'e ppiante mm'hanno letto 'nfronte
ca mm'hê traduto,
ca tutt'ammore nuosto è giá fernuto...
Ammore amato
p''e vvie sulitarie 'e Capemonte!...
Carmela, Carmè'...
I' TE VURRIA VASA'
V. Russo - Di Capua
Ah! Che bell'aria fresca...
Ch'addore 'e malvarosa...
E tu durmenno staje,
'ncopp'a sti ffronne 'e rosa!
'O sole, a poco a poco,
pe' stu ciardino sponta...
'o viento passa e vasa
stu ricciulillo 'nfronte!
I' te vurría vasá...
I' te vurría vasá...
ma 'o core nun mm''o ddice
'e te scetá...
'e te scetá!...
I' mme vurría addurmí...
I' mme vurría addurmí...
vicino ô sciato tujo,
n'ora pur'i'...
n'ora pur'i'!...
Tu duorme oje Rosa mia...
e duorme a suonno chino,
mentr'io guardo, 'ncantato,
stu musso curallino...
E chesti ccarne fresche,
e chesti ttrezze nere,
mme mettono, 'int''o core,
mille male penziere!
I' te vurría vasá...
............................
Sento stu core tujo
ca sbatte comm'a ll'onne!
Durmenno, angelo mio,
chisà tu a chi te suonne...
'A gelusia turmenta
stu core mio malato:
Te suonne a me?...Dimméllo!
O pure suonne a n'ato?
I' te vurría vasá...
............................
MANCA SOLO
voc' 'e nott'
